المشاركات
طبعك يا دنيا عنيد أنا عارف وما بيديش
عليا تضيقي حزامك وحارماني حتي أعيش
تآسيني،تعانديني ويوم ورا يوم تلاوعيني
ولا مرة تطاوعيني وغير صبري يا دنيا ماليش
هاصبر،ولوصبري مني مل ولو جسمي مني سل
ولو عقلي السليم اختل وياريت صبري ما يتعبنيش
تدي الخسيس بالكوم وياكتر كتير ويدوم
واشبع أنا م اللوم واسأل تقولي مافيش
تملي ف جرحي فاكراني وتديني جراح تاني
وكمان للحزن عارفاني وف فرحي ما تعرفينيش
ظالم وانا اللي انظلم والخيط خلاص اترسم
برئ ولكن متهم وجلادك ما يرحمنيش
كرباجه بيلسعني وآلامه بتوجعني
هتقولي..وايه يعني؟! اديله ولا تهديش
لا زاد فيكي بيحلالي ولا سايباني انا ف حالي
سقتيني المر طوالي وعذاب أشرب ولا ابقيش
مش لاقي فيكي أمل كتاب آلامي اكتمل
يا دنيا ايه العمل؟! أرحل..ولا ما يكفيش
(محمد مرزوق..أبو شادي)
